توجهت الفنانة زينة عبر صفحتها على موقع التواصل الاجتماعي "انستغرام" برسالة شكر إلى القضاء المصري الذى أظهر الحق فى قضية اثبات نسب توأمها إلى والدهم الفنان أحمد عز وذلك بعد تداول القضية فى أروقة المحاكم عدة أشهر.

وقالت زينة "بشكر القضاء المصري العظيم اللي أظهر الحق، الحمد لله، عاوزة أوضح حاجة علشان الكذب المستمر، الحكم الحمد لله بيعتمد على إثبات الزواج وبناء عليه تم إثبات النسب أنا كنت ملتزمة الصمت وتعرضت للإشاعات الحقيرة، وكنت بشوف اللي بيتقال عليا والحقيقة، أنى كنت واثقه فى عدل رينا الحمد لله".

وأضافت، "الانتصار ده مش انتصار ليا لوحدي، ده للستات كلهم، القضية دي فى منها كتير، بس قضيتي اتحولت لرأي عام علشان أنا مشهورة والطرف التاني برده، نفسي كل ست مظلومة تاخد حقها حتى لو غلطت واتجوزت واحد عديم الضمير والإنسانية، وكداب حتى فى النفس اللي بيتنفسه، وربنا يكفى كل البنات شر عديمي الرجولة ويكرمهم بناس محترمة تحافظ عليهم وأكيد فى ناس محترمة كتير، يارب يستر كل البنات ويحفظهم".

و أكملت تعليقها "ربنا أظهر الحق الحمد لله، وأنا عاوزة أعيش وأربي ولادي وأشوف شغلي وأنسى الأيام السودة اللي شفتها من أول الجواز لغاية يوم الحكم، مش عاوزة أسمع أسم أبو أولادي ده تاني، ولا حتى حد يغلط فيه، علشان مايصحش للأسف علشان ولاده، وربنا كبير ولسه حسابه عند ربنا الله يكون فى عونه بقى ساعة الحساب اللى مافيهاش معجبات".