كشفت الفنانة المصرية لقاء سويدان، أسباب عدولها عن قرار الاعتزال الذي كانت قد اتخذته منذ عدة أشهر بشكل مفاجئ ودون مقدمات. وقالت لقاء: "تفاجأت أنني رجعت من الاعتزال، مكنتش مخططة للعودة، ولا كنت مخططة للاعتزال من الأساس، في حاجات كتير مكنتش مبسوطة بيها وحاجات محيطة بالفن وفي العملية الفنية".

وأوضحت سويدان: "ساعات تشتغلي مع حد تلاقيه مش محترف أوي، وأنا اشتغلت مع ناس كتير مهمين من وأنا صغيرة، زي سعاد حسني ومع أعظم المخرجين مرورًا بأكبر نجوم مصر وحتى الشباب بينهم، التغيير الي بيحصل والتعامل بشكل مختلف ده أثر عليا، وكنت محتاجة وقت".

وتابعت: "فجأة صحيت قلت مش عايزة أكمل في الوسط وخلاص، وكان جايلي فرصة عمل في دبي، عبارة عن تدريس دراما، يعني في المجال برده، وافقت ومقولتش لحد إلا المقربين جدًا ليا، علشان محدش يرجعني ولا يقولي لا".

وأردفت الفنانة المصرية: "وبعدين الوضع استقر، وجت الكورونا اللي غيرت حاجات كتير، منها القعدة في البيت، ابتديت أقرأ كتير، وبطلت أتفرج على التلفزيون، حسيت إن في حاجة ربنا عاوز يقولها، فابتديت أراجع حساباتي ونظرتي في حاجات كتير".

وواصلت حديثها قائلة: "2020 سنة حلوة جدًا بالنسبالي، 2019 هي اللي كانت صعبة لإني كنت بمر بمرحلة تخبط جوايا، حاجات كتير أوي كنت عايشة عليها وحاجات ظهرت، هل أنا صح ولا غلط؟". واستطردت: "في 2020 خدت قرار وشايفة إنها الحمد لله سنة كويسة بالنسبة لي، لإني ابتديت أفهم حاجات كتير أوي وربنا كان بيبعتلي علامات".

وأكملت: "جربت أعيش برة مصر، واكتشفت إني مش هقدر لإني إنسانة عشرية وصعب أعيش بعيد عن أهلي وأصحابي، وبحب الفن وصعب أعيش بعيدة عنه".

واستطردت: "أنا طول عمري محاربة ومش بستسلم ودايمًا بيقولوا عني ثورجية وقوية، ممكن نقول إني كنت في استراحة محارب ومكنتش مخططة أرجع إزاي، كل الي رجعني مصر إن بنتي كانت بتمتحن هنا وخفت الكورونا يحصل بسببها حاجات أكتر".

وأضافت: "فوجئت بعد ما رجعت بكام يوم، عرفت إنهم عاوزيني في مسرحية والدكتورة إيناس عبد الدايم وزيرة الثقافة هي الي طلبتني لما عرفت إني رجعت.. والمخرج مراد منير كان نفسي أشتغل معاه، فقلت أوك لحد ما آخد القرار، ويوم التصوير لقيت عادل عبده بيقولي إنتي في مصر وفي مسرحية بتاعتك (سيد درويش).. إنتي كنتي اعتذرتي عنها وكنتي أول ترشيح، المسرحية مستنياكي، إنتي هتيجي تعملي بروفة".

واختتمت لقاء سويدان: "لقيت العرض كله غناء استعراضي، 30 أغنية بعمل منها 5، ولقيت نفسي تمام وبتفق على التفاصيل ولا كإني مكنتش موجودة".

قد يهمك أيضا :  

لقاء سويدان تُدافِع عن يوسف الشريف وتؤكّد أنّه حرّ في اختياراته

لقاء سويدان تكشف تفاصيل مشاركتها في "سيد درويش" المسرحي